Feedback & Karma

Eerste Schreed · 10 vun 11

Di fallt en Fehler op, du hest en Idee oder di stöört wat? Dor gifft dat de Feedback-Funktschoon för – to finnen över den Link „Feedback" ganz ünnen op de Siet oder över den Knoop in dien Profil.

Bi't Afgeven söchst du twee Saken ut:

De Oort: 🐞 Fehler · 💡 Verbetern · ✨ Ne'e Idee · ❓ Fraag
Dat Rebeet: en bestimmt Speel oder en allgemeen Rebeet vun de Siet (Startsiet & Lobby, Konto & Profil, Frünnen & Teams, Musik & Inholt, Barrierefreeheit, Anners wat)

Dorto kaamt en korten Titel un en Beschrieven. An'n mehrsten helpt: wat hest du maakt, wat hest du verwacht, wat is statt dat passeert – un bi Fehlers geern Gerät un Browser.

Du kannst bet to dree Screenshots anhangen. Pass op, dat keen Namen vun anner Lüüd oder private Daten in't Bild staht – dat Admin-Team süht de Biller so, as se sünd.

Feedback afgeven kann, wokeen mit sien Konto anmellt is. Dat dat nich överhand nimmt, dröffst du blots en poor apen Vörgäng to de sülvige Tiet hebben.

Hest du en bestätigte E-Mail-Adress achterleggt, schickt wi di en Naricht, sodraad dat wat Ne'es gifft. Ahn Adress geiht dat nich — denn kiek eenfach in't Profil ünner „💬 Feedback“ na, dor steiht de Stand.

Nich de richtige Weg, wenn du di över Mitspelers besweren wullt. Wenn een beleidigt oder gegen de Regeln verstött, mellst du dat direkt bi de Person: Naam anklicken un in de Profilkoort op „🚩 Speler mellen“ – blots so kummt dat bi dat Moderatschoonsteam an.

Wat dorna passeert

Dien Vörgang kriggt en Nummer un en Status. Solang he apen is, köönt ji beid wat dorto seggen – du un dat Admin-Team:

Status	Bedüden
🆕 Anleggt	Afgeven, noch nich bearbeidt
🔧 Warrt bearbeidt	Dor kümmert sik een üm
👍 Annahmen	Dat Ümsetten is toseggt, aver noch nich maakt – du kannst wieder nafragen
🚀 Ümsett	Fardig un utlevert. De Vörgang is tomaakt
✖ Aflehnt	Warrt nich ümsett. De Vörgang is tomaakt – worüm, steiht in'n Verloop

Bi de beiden letzten Status is de Vörgang tomaakt: He lett sik noch lesen, aver du kannst nix mehr dortoschrieven. För en Saak, de dormit to doon hett, giffst du denn eenfach en nee Feedback af.

All dien Vörgäng finnst du in't Profil ünner „💬 Feedback". Gifft dat dor en ne'e Antwoort, sühst du en lütte Tall an'n Tab. Solang noch nüms antwoordt hett, kannst du en Vörgang ok wedder trüchtrecken.

Karmapunkten

Warrt dien Feedback annahmen, kriggst du dor en Karmapunkt ✨ för – een je Vörgang. Dat is eenfach en Dankeschöön: Karmapunkten laat sik nich intuuschen, nich verschenken un bringt in't Speel keen Vördeel. Se wiest blots, dat du wat för den Saloon daan hest.

Dien Punktenstand steiht in dien Profil un is ok för anner anmellte Spelers to sehn. Welk Vörgäng dor achter steekt, sühst blots du sülvst.

För dien allereersten Karmapunkt gifft dat ok noch den Erfolg „Hölpsame Seel".